Titley

Tá sé ráite ag an scoláire Philip O’Leary gur ‘serious injustice – to Titley, to literature in Irish, and to potential readers’ é a laghad ábhar critice atá scríofa air. Iarracht ar chuid den bhearna sin a líonadh atá sa leabhar seo, ina bhféachann Coilféir le teacht ar bhunfhoinsí ceapadóireachta Titley. Is é a shaothar scríofa agus stáitse, seachas a shaothar don raidió nó don teilifís, atá faoi chaibidil sa leabhar seo agus cuirtear san áireamh nach mór a bhfuil foilsithe aige óna chéad alt in 1965 go dtí an t-alt is deireanaí uaidh in 2014. Mar is dual d’údar a bhfuil beagnach caoga bliain caite aige i mbun pinn, tá líon mór scríbhinní curtha de aige agus éagsúlacht mhór stíle agus scéalaíochta iontu dá réir.